ഇറോം ഷര്‍മ്മിള.....

ഇറോം ഷര്‍മ്മിളയെ ഒരു ഫോട്ടോയിലൂടെപ്പോലും
ഞാന്‍ കണ്ടിട്ടില്ല ...
പക്ഷെ മനുഷ്യാവകാശ ധ്വംസനങ്ങള്‍ക്കെതിരെയുള്ള
ചെറു ചലനങ്ങളില്‍പ്പോലും ഞാനവളെ കാണുന്നു

അവള്‍ സുന്ദരിയോ, മനോഹരമായി പുഞ്ചിരിക്കുന്നവളോ
ആയിരിക്കുമോ എന്നെനിക്കറിയില്ല...
പക്ഷെ ആ നിശ്ചയദാര്‍ഡ്യം അതിമനോഹരവും,
അതിസുന്ദരവും ആണെന്ന് ഞാനറിയുന്നു

ആന്ഗ് സ്യാന്ഗ് സ്യൂചിയുടെ ഏകാന്തത എന്നെ വീര്‍പ്പു മുട്ടിക്കുമ്പോള്‍
ശര്‍മ്മിളയുടെ വിശപ്പ്‌ എന്നെ അലോസരപ്പെടുത്തുന്നു

ഏതൊരു പെണ്ണിനേയും പോലെ ജീവിതത്തിന്റെ വര്‍ണ്ണ വസന്തങ്ങളെ
ഇവളും സ്വപ്നം കണ്ടിരുന്നിരിക്കണം

പക്ഷെ ഇപ്പോളവളുടെ സ്വപ്‌നങ്ങള്‍ ഉറക്കത്തില്‍ കാണുന്നവയല്ല
അവളെ ഉണ്ണാനോ ഉറങ്ങാനോ അനുവദിക്കാത്തവയാണ്

മണിപ്പൂരിലെ മാലോം ബസ്‌ സ്റ്റാന്‍ഡില്‍
സായുധ സേനയുടെ വെടിയുണ്ടകള്‍ പൊലിച്ച
യുവാക്കളുടെ പ്രാണനും രോദനവും...... ‍

മണ്ണിന്റെ മാനം കാക്കുന്നവര്‍ കൂട്ടം ചേര്‍ന്ന് കവര്‍ന്നെറിഞ്ഞ‍
താനുഞ്ചം മനോരമയുടെ മാനവും ജീവനും......

മറ്റാരെക്കാളും അലോസരപ്പെടുത്തിയത്, അസ്വസ്ഥമാക്കിയത്
അവളെ മാത്രമാണല്ലോ

ഞാനടക്കമുള്ളവര്‍  ഉണ്ടുറങ്ങി ഉല്ലസിക്കുമ്പോള്‍
നിനക്കുറങ്ങാനാകുന്നില്ല, ഉണ്ണാനാകുന്നില്ല

നിനക്കായി, നിന്‍റെ സ്വപ്നങ്ങള്‍ക്കായി നല്‍കട്ടെയെന്‍
പ്രാര്‍ഥനയും, ഭാവുകങ്ങളും

മഹാശ്വേതാ ദേവി പറഞ്ഞതുപോലെ
വരും കാലം ഇരുപത്തിയൊന്നാം നൂറ്റാണ്ടിനെ
കാണുന്നത് നിന്നിലൂടെയാവും .....